The World Of Little Fish --------------------------------------------------------------------- Life is full of surprises, even two parallel lines may one day meet
Sunday, 28 November 2010
-
UNICEF Charity Run 2010
昨晚十點己經上床訓了,
今早 3:45 便起身,
食完早餐搭的士到青衣港鐵站,
去到時港鐵站竟然仍未開門呢. XD未到 5:30 便到達迪士尼,
熱身後半馬準時於此 6:15 開跑.
今早的天氣 20 度左右,
實在很適合跑步.
我其實鍾意跑聯合國這個多過渣打馬拉松,
因為這裡的空氣好得多,
渣打馬拉松當跑經中環時,
其實空氣質素不是太理想呢. ~~~今天我跑完的時間大約 1 hr 45 min 多少少,
因為我過計時的紅地毯時比大會時間遲咗,
所以我只是根據自己的手錶計時,
遲些才知正式時間.
上年的跑 1 hr 48 min,
所以今年一定比上年快咗,
唔知出年仲可唔可以 keep 得到呢 ? ~~~劉俊逸跑十公里只需 41 min,
實在太厲害了,
我今日跑到十公里那裡時大約要 48 min 尾啊 !今年我地又攞到最多人參與奬,
只可惜今年只得第三名,
上年我們是第一名的呢 !
希望出年多些同學參加,
其實 3 km 好多同學都跑到,
跟環村差不多,
仲冇林護個段路咁斜添.
跑到環村的話一定跑得完,
出年大家一定要參加喔 ! :]
Saturday, 27 November 2010
-
精彩的李中校園生活
昨晚七點離開學校的時候,
李兆基的校園還好不熱鬧,
校園到處也是師生. ~~~
泳池有幾十個女童軍 BBQ,
而泳池的另一端也有老師圍在一起燒烤,
足球場, 排球場也有學生打波. ~~~
翁佑就更厲害,
近百輔導組的組員正在打邊爐,
其實在熊貓酒店的裕滿人家也有 7B 的同學正在火鍋呢. ~~~
其實以往我也有參加教師的池邊 BBQ,
昨天上堂時中七的同學亦有邀請我出席他們的活動,
不過因為教會有團友從外國回來,
所以有家庭聚會,
因此也不能出席了.
李兆基的生活真的是多采多姿,
每天好多學生都留到好晚才離開校園,
無論做功課, 玩遊戲, 打波, 課外活動, ... 也好,
學生願意留低顯示他們對學校有歸屬感,
我知有好多學校一放學,
教師及學生也不會多留在學校,
有些甚至 5 點前已經全校清場.
所以李兆基的校園生活當真是給學生好多精彩的回憶. ~~~
昨天午膳時與班會成員食飯,
剛好是普通話學會的點唱時間,
好多謝 Tracy 的安排,
為我播了五月天的 "知足" 給 3D, 3E, 6B 7B 的同學,
其實我揀了兩首歌,
另一首是孫燕姿的 "遇見",
最後 Tracy 親自操刀讀出 3D 的點唱信給我和 Ms Yip,
原來她將這首歌放到最後由自己讀出, 好有心思,
而且仲有班會成員一起讀呢.
好窩心的一封點唱信.
在這裡多謝 3D 班同學的點唱,
特別是班會成員,
今年能做到大家的副主任,
真的是要感謝神,
雖然多年冇教中三,
好多筆記, 習作都要重新打過,
每天都要做到好夜,
但辛苦若做在學生身上,
這總是值得的.
Tracy 的普通話不只純正,
而且聽入耳好舒服,
點解早會唔搵 Tracy 宣佈呢 ?
雖然未聽過 Tracy & Cissy 的合唱,
不過也不難理解她們可以入到決賽呢. :)
放學後上去課室見大家都拿著相機影相,
原來又是要做功課,
不過呢份功課大家都做得好開心,
見到大家考完四個 JT 後,
心情也放鬆了,
希望大好好享受這個週末.
明天我要跑 UNICEF 的半馬,
半馬 6:30 便要起跑,
所以我要 5 點便出門口,
今晚我好早好早便要上床 ( 我係未好乖呢 ),
所以大家今晚係 msn, fb 都見唔到我 gar la. XD
參加咗 UNICEF 慈善跑的同學,
大家明天都要加油喔 !
Thursday, 18 November 2010
-
X-Country Competition
上年我都有幫 Lo Sir 帶越野隊去比賽,
不過上年係好凍,
今日則好好多了,
天氣可謂十分適合跑步呢.唔知今日的成績算唔算係豐收,
又唔知校長及 Lo Sir 是否滿意呢 ?
雖然兩年我都有幫 Lo Sir 帶越野隊去比賽,
不過我其實沒有出席過他們的練習,
講起來真係好慚愧呢.
所以我都唔係好敢企埋去同佢地一齊影相呢.
心裡其實都好想跟佢地一齊跑的,
希望真係想得出, 做得到呢 !有冇留意你地去頒獎禮時,
唔見咗 Cheung Sir 呢 ?
因為我趁最後女丙開跑後,
我便去跑步, 大約跑咗 10K 左右,
咁好天氣,
上到城門水塘唔跑好浪費啫, XD.
如果可以的話,
我真係好想吓比賽的那條路綫呢 !
講真我地女乙真係好屈機,
我地 5 個女仔,
全部都係 10 名之內, Superb !!!
Sunday, 07 November 2010
-
"3D" Map --- 我們的地圖
星期四晚落雨,
而且我又想留係學校睇吓大家的 3D map 做成點,
所以冇去青衣長廊跑步.
今日又係落雨,
諗住返學校做野先,
星期日才去跑.
點知七點離開學校時,
見到葵盛圍有人跑步,
而且又冇落雨,
因此又引起我跑步的興致,
所以晚飯只是食咗少少.
九點落去跑步,
由麗城先跑去海濱,
再跑入去深井,
跟住跑返出黎再去海濱,
大約跑咗個半鐘.
這條跑線我已經好熟了,
但晩間跑跟我日間跑好唔同,
首先沿路都好靜,
好少人,
有都係兩夫婦或情侶,
所以女孩子都唔係好適宜咁晚跑入去深井,
以免有危險呢.
不過晚間跑的好處係較清涼,
冇日間咁辛苦,
特別係我慣咗中午先跑,
所以時間都快了,
跑起上黎都感覺輕鬆咗呢 !
不過我都係鍾意日間跑多一點,
貪佢可以出多點汗 !
跑步的時候,
想起十二月有外評 ( 真係好辛苦！ ),
又想起大家的 3D Map,
好擔心唔知大家做成點,
星期一有冇得交呢 ?
我知大家為咗呢個 3D Map 做得好辛苦,
好多同學都每日做到七點幾八點先走,
可惜我又幫唔到大家咩野.
希望過埋星期一大家會有好日子過啦 !
大家努力喔,
交完 3D Map 係記得每日清數噢 !
Saturday, 23 October 2010
-
Thank you , my dear 3D students !
今天晚上一打開 Facebook
便被 Yuki 的 "Sorry, Sorry ....." 所吸引
睇完之後
原來還有好多 3D 同學的回應
一路睇大家所寫的心聲真的好感動
其實昨夜心心已係我的 Wall 上講多謝
我還未向她講多謝呢
大家真的不用這麼客氣
Halloween Party 是大家一早計劃好的
因為颶風的關係而取消
這個 ...
大家也不想發生
但預早取消總好過真的掛風球時
所訂的食物不能退款時
浪費了金錢之餘也浪費了食物
看到星期五這麼好的天氣
我也暗暗替你們可惜
特別是負責的同學所花的心機
之前我見他們放學後己開了好幾次會議
有一次我成六點半走他們仍在開會
好欣賞大家這麼認真
因此當大家想星期五放學繼續這個 Halloween Party
我也不想令大家掃興
我知若沒有老師陪同
大家係好難留到這麼晚的
而且萬一有事發生時
這個是很難講得過的
至於我這麼晩才回家吃飯
大家不用覺得不好意思呢
我好少唔返屋企吃飯的
所以家人都沒有問題
留飯給我便可以了
我遲了回家吃晚
大家向我 say sorry
這個更加令我唔好意思
因為我每星期四晚都會去青衣海濱長廊跑步
我也是空著肚子
七點跑到八點半
跟住都成九點先食晚飯
我其實晚上都食好少野
所以絕對餓唔壞我的
大家不用擔心
我真的好多謝大家的關心
其實 ...
要說對不起的是我呢
我之前答應了大家參與這個 party 的
我雖然留下陪大家
但我卻沒有參與其中
一個原因是我答應了工友有事的時候可以係教員室搵我
若我在隨大家四圍走
這麼黑的環境中
有事的時候工友怎找我呢
另一個原因是我工作上有點兒唔開心
想自己反思一下
所以我便沒有陪大家一齊玩了
希望大家當晚玩得開心吧
不過若有安排不妥當的話
希望大家可以體諒負責的同學
因為這麼急的情況之下
有甚麼甩漏也是可以原諒的
我見他們都已盡了力去做到最好的了
多點站係別人的位置
那麼大家便會多點體諒包容呢, 記住唷 !
其實過去的一星期及未來幾星期
我知大家都會好忙
我自己都好忙
不過最重要的是忙得開心及學到野
好欣賞大家工作時這麼投入
希望大家努力
ADD OIL !!!
Tuesday, 12 October 2010
-
環村跑
上星期五校方因為恐防落雨而將環村跑推延到今天
結果是星期五天色放晴
好多同學及老師都說 "早知 ......"
其實呢個世界那會有早知這回事
俗語有云 "有早知 , 冇乞兒"
上星期六我如常跑步時都落緊雨
攪到我全身都落湯雞咁
一面跑步 , 一面擔心星期一的天氣 ...
星期日都有同學係 FB 玩填充題 "如果明天落雨 , ..."
結果今日的天氣都好適合跑步
我相信最開心的應該係 Lo Sir 及校長了
因為 3D and 3E 都有好多男同學參加
所以我決定陪中三的男同學一齊跑
( 有中七的同學話 "阿 Sir 你都唔係陪我地跑 gei ..."
咁就當我陪大家一齊開跑啦 )
今日我由第一圈林護上山開始就一直都跟住文朗軒跑
到最後返黎都係俾文朗軒放甩咗
( 文朗軒好野 , 服咗你 ! )
結果係以第三名返終點
名次前年係第七 , 上年係第四 ,
名次係前咗
但時間我仍未知幾多
以我最後望手錶估計
可能係 28 min 尾 29 min 頭左右
要問問 Lo Sir 先可知
其實以我 52 的年齡
體力應該係逐年下跌
現在 keep 得到咁 gei 時間
我都幾滿意
希望到我 60 歲退休時 ....
我都可以同學生一齊跑 5000 m 及環村呢 !
鍾妍好叻女啊
跑到第二返黎
不讓文朗軒專美呢
其他 3D 同學都好努力噢
希望出年我仍可以同你地一齊跑啦 !
Sunday, 10 October 2010
-
Little Fish 近幾個月來的生活點滴
真係好耐冇寫 Blog 了,
因為自從冇請菲傭之後, 每晚回家都好多家務要做,
今年又教兩班中三, 每天都至少有一疊測驗卷要改,
每晚都要兩點幾三點先可以上床休息.
其實今年冇教中四, 反之教咗兩班中三,
雖然唔駛做班主任, 只係做 3D 副班主任,
工作量都冇話點少咗, 好似仲辛苦咗 tim.
由暑假至今, 體重便一直下降,
暑假時都有 122 lb ( 55.5 kg ),
開學後便只得 120 lb ( 54.5 kb ),
跟住就睇住個磅再跌到 118 lb ( 53.6 kg ),
昨天跑完步之後更只係得返 116 lb ( 52.7 kg ).
唉 ... 再係咁跌 ... 好快會跌到 0 ( T__T )
明天係環村跑, 3D & 3E 都好多人參加,
所以我今年都係跟中三男仔跑, 陪大家 ma.
咁大家要努力加油喔 !
Sunday, 01 August 2010
-
AUG 4 CE 放榜
CE 快要放榜 , 大家要及早做定功課喔
會考星期三便要放榜了，所以最近都多了同學在 msn 問我有關放榜當天的情形。
我相信大家最關心的不外是 ...
若不能回李兆基讀中六，當天應如何揀學校 ?
而中六的科目組合又如何選擇 ?
3AL , 2AL + 2AS , 2AL + 1AS 究竟有何分別 ？
放榜當天大家會在課室等候班主任派 Result Slip，其實學校收到成績後便立即將大家的 Best 6 分數排好隊。文理兩班大約每班會收 30 人，所以學校會先將最高分的 Result Slips 收起，通常都會多過 30 張，因為學校還會再計第二輪的分數，所以接近 Border line 的同學都會有機會要面試。
所以當大家見我入到課室時，有部分同學的 Result Slips 已被收起，這些同學都要立即落禮堂填選科的 Form，不過有得填 Form 唔表示一定會收，因為學校會再計第二輪的分數，而第二輪的分數主要再計多一次與大家所揀科目相關學科的分數。假如有同學其中兩個 A 係電腦及 Bio，而他卻想讀 Phy+Chem+Pure 這個組合，那麼第二輪便唔會計電腦及 Bio 的了，因此大家要好小心揀科呢。
對理科生而言，中化、UE and Phy 係必修，跟住係 Chem/App Maths/Account 揀一科，最後係 Bio/Pure Maths/Arts 揀多一科 ( 好似係餐廳叫 set dinner 咁，Ha )，大家總共要讀 3AL+2AS。如果有同學想讀 Eco 的話，那麼好抱歉我們俾唔到大家了。
如果當天我叫大家個名出黎攞 Result Slips 的話，這個表示大家下午便要係聯招中心搵學校了，我真係希望大家就算返唔到李兆基的話都不用傷心。因為若有得 19 分那麼搵學校都會較容易，通常呢個分數係第一輪便已經有學校收咗，不用等第二輪，因此大家要好小心揀學校，以免學校收你時，你又後悔唔想去讀，白白浪費了第一輪的機會喔 !
那麼 3AL , 2AL + 2AS , 2AL + 1AS 又是怎樣一回事呢 ? 原來大學基本的要求是 2AL，學校要求所有同學科讀 3AL 是保險的做法，萬一 fail 咗一科都仲可以入到大學 ma。如果三科都有好成績，那麼更會加強了自己入大學的本錢呢。而且實況是一些熱門的科目例如精算、Global business 等更加要 3A 再加上兩科語文也要 C 才可以入到喔。換句話說，只是讀 2AL 的話，不單只兩科 AL 都唔可以 fail 外，仲一定入唔到那些熱門的科目 tim !
AS 的情況是這樣的，有些科目的課程是 AL 的一半外，但課程要求跟 AL 一樣，另一個可能是課程寬度跟 AL 一樣，但深度只是 AL 的一半外。無論是哪個情況，AS 也是較易應付，所以 AS 的 A 也冇咁值租啦，因此 AS 的成績大約要乘 0.6 ( 因為唔同大學有唔同的計法，但約莫都是這樣 )，即是 AS 的 A 大約等於 AL 的 C ! 明白了這個分別，大家便會知道 2AL + 2AS 都是保險的做法，但我認為 2AL + 2AS 一定不會比 3AL 容易讀呢。
2AL + 1AS 跟 2AL 一樣，兩個 AL 都唔可以 fail，不過多了一科 AS，本錢當然大過只得 2AL 的考生啦，但我懷疑有幾多學校只要求學生讀 2AL，特別係 banding 高個 D 學校。其實這些有時都唔到你揀，都是學校的決定，例如李兆基所有人都要讀 3AL，而李賢堯則只是高過 19 分先可以讀 3AL，所以大家要放榜前做定功課，睇吓那些放榜天書，因為每間學校的做法也不一樣喔 !
這些天書仲列明每間學校開那些科目，好似理科生想讀 Eco，李兆基俾唔到你，或者其他學校得呢，所以大家一定要係放榜前做好功課 ! 你要計劃好萬一返唔到李兆基，19 分的話便去那間中學報名，萬一失手到只得 16 分以下又會怎樣，這些都最好放榜前想好了，因為放榜那天萬一是意料之外便會手足無措，到時個心都會亂到甚麼也想不到呢，記住 Hope for the BEST , Plan for the WORST !!!
萬一當天要去搵學校的，記住你揀學校時，學校亦會揀學生，當然越高分便會越快搵到學校，相信大家都明白這是很自然的呢。所以當天要當機立斷，分數不高的，便不要揀一些收生要求高的學校，多點和同學及老師商量，不用擔心的呢，因為我及好多老師也會係當天盡力幫大家的。
在這裡祝願大家放榜當天有理想的成績，雖然不可能所有人也返到李兆基升讀中六，但我真的盼望所有人也可以升上中六，只要大家一起努力，儘管大家未來兩年會在不同學校讀書，但最終大家也會在不同的大學裡重聚的，而這亦是我的願望，祝願大家最終也能全部升上大學，雖然每個人要走那條路也不同，有的平坦一點，有的崎嶇一點，只要大家有決心及不放棄，相信大家一定可以做到的喔 !
最後，希望大家為自己的夢想努力 !
Saturday, 10 July 2010
-
喬峰．張無忌．令狐沖
天龍八部．倚天屠龍記．笑傲江湖
大約兩個月前在朋友家中見到金庸的「笑傲江湖」，其實多年前我已經看過兩次了，但反正沒有甚麼緊要事做，於是便拿上手看了百多頁。豈不知不看尤是可，一看便不得了，雖然「笑傲江湖」早已看過了，但仍然是很吸引我追落去，於是自己買了一套來看。
看完「笑傲江湖」，根本收唔到手，很想全部金庸的小說再看一遍，其實有些已經不只看過一次了，但金庸的小說的吸引力就是在這裡，無論看過多少次，再看也是這麼吸引的呢 !
於是「笑傲江湖」之後便是「倚天屠龍記」，現在正睇緊「天龍八部」，剛剛昨天去到阿紫被師父丁春秋弄瞎了雙眼。雖然真的覺得阿紫有時都好惡毒及殘忍，但看到她瞎了雙眼，也有點於心不忍。
... ( 未完待續 )
PS
多謝大家昨天晚上及今天給我我祝賀
給我點時間 ... 我會逐個回覆大家的呢 !
容我再說一句 --- 真是衷心多謝大家 !!!
真的好想好想每人畫個公仔送俾大家喔 !
Tuesday, 29 June 2010
-
祝 F.7 同學高考放榜成績理想
Release Of AL Results
明天就係 A-Level 放榜，唔知各中七同學現時的心情點呢 ?
係網上睇到今年有 366 個同學考到 3A，唔知今年李兆基同學有冇份呢 ? 不過英文科成績好似微跌了些少，希望李兆基同學中、英文兩科全部及格啦 !
明天大家收到成績後，我希望可以見到大家個個都係掛著一個笑臉 !
若然有同學的成績真的是未如理想，希望其他同學可以給他們多點支持，想在這裡送上 Eason 的 「路 ... 一直都在」給大家。
記著「條條大道通羅馬」，求學的路多的是，最重要是大家的心志猶在，前面的路縱是曲折一點有甚麼問題呢 !
最後，係呢度祝願大家可以入到自己心儀的學系喔 !
Sunday, 02 May 2010
-
ADD OIL For Add Maths on May 4
CE Additional Mathematics
明天就考 Econ，而星期二就考 Add Maths 啦，我知有些同學 Chem 考得不是太好，希望大家考完就算啦，唔好再想那麼多了，記住我講考完便不要對答案了，要對的話不妨考完晒先對，好不好 ?
無論如何，前面還有幾科要考，而且英文仍未考，大家要努力加油喔 ! 記住「忘記背後，努力面前」唷 !
星期二考 Add Maths，所以星期一放學後我會留在學校看看大家有甚麼需要我幫忙的，當然空堂時我都會盡量抽空去圖書館探望大家的呢 !
Tuesday, 27 April 2010
-
CE Maths II Q.23 Rotational Symmetry Of A Cube
Axes Of Rotational Symmetry Of A Cube
Many of you asked me about Maths Paper II Question 23.
It would be quite difficult to explain it to you without the model of a cube, of course it would be the best if we can take the advantage of some softwares. I've found a video clip on YouTube which demonstrates to you about the axes of rotational symmetry of a cube.
A cube has a total of 9 planes of reflectional symmetry, which are shown in the following figures.
A cube has a total of 13 axes of rotational symmetry.
All of these 13 axes passes through the centre of the cube ( i.e. II is true ).
3 of the axes perpendicular to the faces of the cube.
The order of these three axes is 4.
4 of the axes coincide with the longest diagonal of the cube.
The order of these three axes is 3.
6 of the axes pass through the mid-points of two sides of the cube.
The order of these three axes is 2.
From the following video, it is obvious that any two intersecting axes of rotational symmetry are NOT necessary perpendicular to each other, thus III is wrong.
Actually, once you are sure that III is wrong, then definitely A is the answer !!!
Hope that this video clip can help you to understand this problem thoroughly.
Remember to look ahead and focus on the coming subjects !!!
WISH YOU HAVE SUPERB PERFORMANCE IN THE COMING SUBJECTS !!!
Sunday, 25 April 2010
-
ADD OIL For CE Mathematics on Apr 26
CE Mathematics
明天就考 CE Maths 啦，作為教你地 Maths 的老師，又係你地班主任，當然更關心你地的備戰情況。大家預備好沒有 ?
昨天一早回學校聽港台的會考點唱節目，不過可惜 ... 算啦，我都係冇用 gar la ( 自嘲中 )。
當然我可以係家裏聽收音機而不用這麼早趕回校，我返學校的原因是想留到下午，好讓大家若回校溫習遇到困難時可以問我的。
那麼我早上做甚麼呢 ? 當聽完點唱後我便沒有再聽聆聽的內容了，因為我落了去葵涌運動場跑步，可以咁講我只是用那裡的貯物櫃及之後沖涼，因為我要跑成二小時，我唔會不停咁係度跑圈的。宇宙會的教練講過經常朝同一方向跑圈太長時間唔係咁好，對膝蓋好傷的。若要經常跑圈的話，最好係有時調轉方向跑。不過這樣會有點危險，有機會同其他跑步者撞到呢。
所以我會跑葵盛圍，昨日跑咗七個大圍及兩個細圍，都好 enjoy 跑葵盛圍，希望有一日可以有充足時間去跑十五個圈呢 ! 跑完後約了朋友在荃灣吃飯，之後返李兆基看看大家溫習的情形如何。不過好可惜大家可能早上考完中文想留在家中休息及溫習，都唔係太多同學回來溫書，5D 好似只得 Yellow Sea，於是我留到四點半便走了。
關於星期一的 Maths ，想提提大家要留意 centroid, in-centre, orthocentre and circumcentre ，因為近年都經常會有這類題目，Paper 1 and Paper 2 都會有，而且有時都幾深添 !
無論如何，大家努力喔，最重要係盡咗自己最大努力，對得住自已便得了，無謂將來後悔呢 ! 大家仲要看看我之前講俾大家聽的要點喔 ! 記住唔識便不要死纏爛打，有時真係要懂得壯士斷臂呢。
Wish you all get good result in the coming Mahts Exam on Monday !!! Pray for you !
PS 我當日都會係李兆基監考呢 !
Thursday, 22 April 2010
-
中五同學為中文努力喔 ! ! !
CE 中文
明天及後天係 CE 中文，似乎好多同學驚中文多過英文 wor，講真一句我自己都好怕而家 D 中文，反而我當年讀中文開心好多呢。我一直都認為而家係 D 中文將英文個套 grammer 搬過黎用，係有點不倫不類的，以前學中文邊有咁多 grammer 要考，主要都是要考一些範文，對我地呢 D 理科同學來說至少有野可以讀，唔似而家好多同學都話唔知點溫中文，我見過中文試卷都覺得好難。近年都見到好多同學英文的成績好過中文，有些極端例子是英文可以是全級頭十名，但中文可能會唔合格。以前我地只會擔心英文唔合格，中文都無須擔心的呢。就算而家我都覺得英文的 grammer 係有得讀的，而且好多都好有系統及合邏輯，但中文 D grammer 有時真係好難捉摸 lor 。無論如何，我都係呢度祝願大家明天及後天係中文科可以有理想的成績。
不過大家就算過咗會考呢一關都唔可以放鬆喔，因為中六都仲要讀中化，好多同學都係好怕呢一科呢。總之大家一定要讀好兩科語文，唔係將來因為語文成績唔夠好而入唔到大學便後悔莫及唷 !
AL 煞科啦
中五同學剛考完一科或兩科，而中七同學除咗讀會計的同學已經考完呢。你地就開心啦，有一個超長的暑假，假設大學九月一日開課，大家都有近四個月的假期喔 ! 玩返一個星期放鬆吓都應該 gei，不過跟住落黎幾個月時間真係唔好日日訓到日上三竿，跟住唔係睇電視就係打機，要知道以後都好難有咁長的一個暑假，將來出黎做野就更加唔駛望有幾個月假期，所以大家要好好運用呢幾個月喔 ! 跑步、游水、打羽毛球、璧球、踩單車、... 都啱我 gar，只要有空的話我一定會陪大家的呢 !
Sunday, 18 April 2010
-
F.5 And F.7 同學加油啊 !!!
CE 第一天開考
明天係 CE 第一天開考，而且仲係考 Physics，一直以來我都感受到班上都好多同學擔心呢一科。係 Physics , Chemistry and Biology 三科中，Physics 對好多同學來說都是最難應付的一科，除了是三科中對數學的要求是最高外，還要求同學對一些 concept 完全的掌握。因此一直以來都係最多同學要搵補習的一科，我常見同學攞住 CW Sham 的筆記，even 沒有去 Sham Sir 那裡補習也要影印一份筆記防身。其實 Sham Sir 都曾經是 LSKC 的老師，我第一年入 LSKC 的時候便和 Sham Sir 做過同事，所以我都知他教公開試班的成績一直是很好的，難怪他的筆記這麼受學生的歡迎呢 !
講返 Physics 呢科，我認為要求同學的數學技巧其實不是太高，反之是要同學完全明白公式的特性及幾條相類似的公式之間的關係，要用哪一條才是最適合呢，這個才是最難的。例如 Constant acceleartion 裡有三條公式 v = u + at , s = ut + (1/2)(t^2) and (v^2) = (u^2) + 2as，我相信冇人背唔到。但係未背到公式就掂呢 ? 這個嘛 ... 當然是兩回事啦 ! 我有教 AL Applied Maths，也要教呢三條公式，所以經常提醒中六同學呢三條公式唔係 independent 的，即是其實只要用其中兩條便已經足夠，成日用齊三條其實是太多公式，反而令到做數過程太混亂 tim 。
由於對中五同學來說係第一科，所以有好多考試的細節大家可能倘未熟悉，例如唔好係宣佈開考前寫 candidate no. 同貼 bar code，... 希望大家今日可以望多眼考生須知，仲有今晚一定要早 D 訓唷，千祈唔好俾我係 msn 仲見到大家呢 !!!
中五同學開始第一科，但中七同學已經考咗 Pure Maths , Biology and Applied Maths ，倘欠 Chemistry and Physics ，過埋下星期便考完了，無論之前的科目考成點都好，希望中七同學都努力專心考埋餘下的科目，千祈唔好放棄喔 ! Cheung Sir 一直都支持大家的唷，希望大家係最後呢兩科中有理想的表現。考完試有空的話可以約我打波、跑步、... 我可以抽空的話一定出來的呢。
中七及中五同學為公開試加油喔 !!!
Little___Fish
-
- Name:
- Location: Hong Kong
- Gender: Male
- Member Since: 4/18/2006
Chatboard (1)